lipu toki sin mi

o kama pona tawa lipu toki mi pi toki pona!

ni li lipu mi pi toki pona! mi wile sitelen e ona tan ni: mi musi kepeken toki pona la mi ken pilin e ijo mute pi insa toki pi toki ali en sona toki kin!
o mi mute
li kama sona e toki sin mute!
mi mute o kama sona e toki sin ni kin!

8.6.2011

pini pi tenpo sona pi toki pona

sina mute o,
jan pona mi o,
jan pi kama sona e toki ni poka mi o,
tenpo pimeja pona !

tenpo ni la tenpo sona pi mi mute li pini kin.
ken la sina mute wile kute e ala pi ijo nasa ni.
tenpo ni la toki pona li pilin ike tawa jan mute la mi kin pilin ike mute.
tenpo sona pi mi mute li pilin ike tawa jan mute. ni li lon la pakala mi!
ni li lon la ni li lon tan ni: tenpo suno pini la en tenpo suno ni la toki pona li pakala e pilin pona sina tawa toki pona.
ni li lon la sina sona e tan pi tenpo ike ni.

o weka e pilin ike pi ijo ni tan lawa sina!
mi wile e ni: ijo ike pi toki pona li lon insa tenpo pini.

tenpo pi pali ala pini la
ken la sina kama sona sin e toki pona.
ni li lon la o sitelen e ni tawa mi kepeken toki ni anu toki Kanse !

taso mi wile kin toki e ni: jan mute ala kin li pali pona e tenpo pana pi toki pona. jan ni li ken tawa pona e toki mute tan toki pona tawa toki Kanse. pona !  

tenpo ni la sina ali sona e ni: toki pona li jo ala e nimi mute. taso ona li ken pali e ni: mi ken toki e ijo mute kepeken ona.

tenpo pi pali ala sina pini la mi wile e ni: mi lukin sin e sina.
mi wile e tenpo pi pali ala pona tawa sina mute ali!

o pilin pona!

5.5.2011

ijo ike pi tenpo suno ali

jan ali li sona e ni:
tenpo suno wan la
mi lukin e jan mute
mi toki tawa jan mute kin.
tenpo ali ala la
pilin pi mi mute en pilin pi jan ante li sama
ni li lon la tenpo pi toki utala ike li ken lon kin
toki utala ike li pona ala tawa mi
jan mute pi toki ike li lon sike mi mute a !
tenpo suno ali la
ike la ni li lon!
o weka e pilin ike tan jan ni tawa lawa sina sama mi!

19.4.2011

kalama ala lon poka supa pi tomo mi

tenpo lili la
mi kute e kalama ala
mi lon poka supa pi tomo mi
tenpo lili wan la
tomo tawa ala li kama
mi ken kute ala e tomo tawa linja kin

tenpo lili ni la li pini
tomo tawa en tomo tawa linja li tawa sin
tenpo pi kalama ala li pini
mi pilin sama tomo mi tan ni:
mi ken kute e kalama suli pi tomo tawa linja

sina sona ala sona e ni: nimi "poka supa pi tomo" li seme ?
ken la sina sona e nimi ante en nimi pona pi nimi ni...

ni li lon la
o toki e ni tawa mi!

6.4.2011

o kon !

o kon
lili mi o !

o musi kepeken toki e ni tawa toki ante mute !

(1)    mi pilin e ni : ona li ken kama
(2)    mi pilin e ni: ona li ken ala kama
(3)    mi pilin e ni: ona li ken kama ala
(4)    mi pilin ala e ni: ona li ken kama
(5)    mi pilin ala e ni: ona li ken ala kama
(6)    mi pilin ala e ni: ona li ken kama ala

30.3.2011

toki pi tomo tawa linja (1)

tenpo suno ni la sama tenpo suno ali la jan mute li toki kepeken ilo toki lon tomo tawa linja. 
mi kute e ali ni: jan wan li toki. ona li wile ante e nimi pi jan kepeken pi ilo sona ona. taso mi sona ala e ni: nimi sin ona pi jan kepeken li seme.
 

27.3.2011

nasin nasa sin

jan seme li ken sona e ni:
nasin nasa ni 
li sin ala sin ?

ken la jan suli ni
li ken ante e ali
li ken kin pona
nasin sin ni. 

// utala a
jan li wile weka mi tan sina 
la
li wile pali e ni:
mi kepeken
nasin nasa sin

jan utala
li weka e sina tan mi
li ante pona
e nasin nasa ni //

sitelen sin 
e nasin nasa 
tawa sina a

lon insa nimi mute ni
mi ken pilin
e ala
lon insa nimi mute sin
mi ken lukin 
e oko sina kin

// utala a
jan lon insa sina li wile tawa
li tawa ma
ma pi suli "sooona aaala"

jan utala
li lon insa sina
la
li weka e ma
ma pi nasin nasa sin //


24.3.2011

toki lili tawa jan kama sona pi mi

tenpo ni la mi pilin lape tan ni: tenpo suno ni la mi pana e sona pi nanpa luka tu tawa jan pona mi pi kama sona. ike a! taso mi pilin e ni: jan mute mi pi kama sona li jan pona li wile kama sona e ijo mute e ijo sin e ijo pona. tenpo mute ala la mi ken ala pana pona e toki pi kama sona tawa toki pi wile sona pi ona mute tan ni: mi sona ala e ali! ni li lon la mi pilin ike. mi sitelen e toki ni la mi pana e pona suli tawa ona mute! 

jan pona mute mi o, toki! o pilin pona o musi kin kepeken toki sin ni!

22.3.2011

tenpo pi pilin pini

tenpo pini 
pi ni
li tenpo pi pilin 

tenpo pilin
pi ni
li tenpo pini ni

21.3.2011

sike suno mi pi toki pona

tenpo sike wan pini la mi kama sona e ni: toki pona li lon!
open la mi musi pona poka toki ni. 
tenpo pimeja mute la mi lape ala tan ni: mi kama sona e nimi en toki mute pi toki pona. ike mute a !
mi jan pi sona toki la toki pona li ante li sin kin mute e pilin mi tawa toki.
tenpo suno ni la mi musi sin kepeken toki pona tan ni: mi pana e sona pi ona tawa jan ante.

taso mi sona kin ala e ni: mi ken ala ken toki e pilin mi en ali mi kepeken ona.

mi pilin e ni: sina sona e (toki) sina lon toki pona la toki pona li pona tawa sina!

20.3.2011

toki lawa mute pi ma Suwasi (1)

ken la sina sona e ni: ma Suwasi li ma lili lon ma Elopa.
ona li sama lupa lili lon insa ma Elopa tan ni: 
ma Suwasi li lon kulupu Elopa ala.
ken la sina sona kin e ni : 
ma Suwasi li jo e toki lawa mute pi nanpa tu tu.

toki lawa pi nanpa wan li toki Tosi. 
taso jan ale pi ma ni li toki kepeken toki Tosi pi ma Suwasi anu toki Suwasi Tosi. 
toki Suwasi Tosi li toki uta taso li sama ala toki Tosi. 
tan ni la jan ale pi ma Tosi Suwasi li sitelen kepeken toki Tosi.

toki lawa pi nanpa tu li toki Kanse 
li toki mama mi anu toki mi pi nanpa wan.

toki lawa pi nanpa tu wan li toki Italija. 
ike la mi ken ala toki e ni. 

jan mute ala li toki e toki lawa pi nanpa tu tu pi ma Suwasi.
nimi pi toki lili ni li toki Letolumasi anu toki Lumasi. 
jan pi nanpa 60'000 taso ken toki e ona. 
jan mute li pilin e ni: tenpo kama lili la toki Lumasi li moli.
ken la ni li lon. taso mi wile ala pilin e ijo ike ni.
sina wile e ni la mi ken pana e sona pi toki Lumasi tawa sina!

toki lawa tu tu ni li toki lawa pi ma Suwasi. 
taso jan mute pi ma ante li lon ma ni. 
ona mute li toki e toki ona 
li ken kin toki e toki wan anu toki mute pi ma Suwasi.

sina pilin ala pilin e ni:
tenpo suno wan la toki pona li kama toki lawa sin lon ma Suwasi?

lipu sitelen sin o, o lon !

lipu sitelen sin o, 
o lon!
...
tenpo suno sin ni la
lipu sitelen sin li lon!
ona li lon ni tan ni:
mi wile sin e pilin mi
mi wile e ni:
kon lete sin pona
li lon insa lawa mi
mi pilin e ni:
lipu sitelen ni
li pana e ni tawa mi!

tenpo suno sin ni la
kalama lili lon insa mi
li toki e ni:
o toki tawa mi!
o kama lape kin ala!

tan kamala ni la
pi tenpo suno sin
mi ken pilin e kon
li suli
li suwi
li lete mute kin

kon sin li lon insa mi
mi kon e kon ni la
mi pilin sin pona
mi wile pana e ni
tawa lipu toki sin mi!

lipu sitelen sin o,
- a sina o ! -
o lon!